ايه اللي جاب الدستور هنا ؟

البنت بنتي لولو

مسيطرة
اللي في قلبها على لسانها
وفي ايديها وفي عنيها وملو فُمها

ولو شفتها وهي بتعمل واجب المدرسة
تلاقيها تنجز لا يهمها الورقة مليانه
فاضية، مفروده، ولا مكرمشة

هتكتب هتكتب على سطور في قلبها

مايلة في عنيا بميزاني

تحفة زي الهرم موزونة عندها

دا رأيها

ونافذ … عليا وعلى المدرسة
ودا الواجب خلاص خلصته
ومش هيتعاد تاني ..
وبكره يابابا واجبكم ها يتنسى

ولولو غاوية تلطع شمس في كل رسمه
صباح كانت ولا مسا
بمناسبة ومن غير مناسبة
في الركن الشمال فوق القلب بشوية
لازم في كل ورقة شمسها الدافية

آه يابنت الايه يا لولو
حتي في الرسم وخداها بالعافية
ياريس لولو في خطوطها اميرة
ومتسلطنة
وحروفهااللي منقوشة منمنمة كده
ومنفوشة ومتعنطزة
وفي الحقيقة معلمة ومسيطرة

ولا علي بالها النحت اللي بتنحتوه
لا يهمها نايب ولا اعلان ولا الدستور
هو بُكره بُكرها بتخُطه بالمنكوش
لا هتمشي علي سطركم
ولا هايهمها حكمكم
وفي قلبها مافيش أمر ولا جبر ولا مأمور ..

في آخر رسمة لولو كتبت
I love
وكام نقطة بعدها
وف عرفكم الجملة كدا ناقصة
نية وتربية ومتهم وذنوب

لكنه دا حِلمها
و الحب في قلبها للكل مقدور
بكرة خلاص لولو
راسماه معفرت ملخبط مشخبط
بس بخط إيدها مكتوب

سيبوا العيال تُحكمنا

بالكورة والزعلة
والضحكة بعد العركة
سيبوا البنات تفكرنا
بالفراشة والزهرة
بالحب زي الفجر
عالفطرة ..

TarekOfCairo

العنوان من اختيار لولو … وانا بقرأ لها فجأة وقفتنا وقلتلي ” هوا ايه اللي جاب الدستور هنا؟” … وعجبي